ل ڕۆژێن ٢٠ و ٢١ی ئۆکتۆبەرێ، ئێکەمین کۆمبوونا ڕێڤەبەرییێ یا نیڤا-دەمی (Mid-Term) یا پڕۆژەیێ “Erasmus+ TRANSITION” ل زانکۆیا نێڤدەولەتییا ڕۆما (UNINT) و ب مێڤاندارییا UNIMED هاتە ئەنجامدان.
د ئەڤێ چالاکییا دوو ڕۆژییدا، نوینەرێن هەمی زانکۆیێن هەڤکار، تیمێ هەماهەنگییا پڕۆژەی، بالیۆزێ یەمەنێ و ئەندامێن UNIMED و UNINT ئامەدەببوون.
ڕوینشتنا ڤەکرنێ: ئاشتی، ناسنامە و ڕۆلێ زانکۆیان
کۆمبوون ب گۆتارا بخێرھاتنێ یا پرۆفیسۆر “ماریاگراتزیا ڕوسۆ”، سەرۆکا UNINT ھاتە ڤەکرن، ناڤبربیێ بخێرهاتنا بەشداربوویان کر و بەحسێ پێگیرییا خۆ یا دێرین بۆ کێمینەیێن زمانی و کەلتۆری کر و ئەوێ دوپات ل سەر ئەوێ چەندێ کر کو ئاشتی نە ب تنێ نەبوونا شەڕییە، بەلکو هەبوونا دادپەروەرییێ، ناسکرنێ و گوهدانا ئەوان کەسانە یێن کو گەلەک جاران دەنگێ ئەوان دهێتە بێدەنگکرن.
د ئەنجامدانا بەرھەڤکرنێدا د ناڤبەرا جڤاکێن کورد، فەلەستینی و کێمینە و خەلکێن ڕەسەن یێن دی ل سەرانسەری جیھانێ، ئەوێ دوپات کر کو ل ھەر جهەکێ زمان بهێتە رەتکرن و کەلتۆر لێ بھێتە ژناڤبرن ، “هەمى مرۆڤایەتی پارچەیەکێ ژ خۆ بەرزە دکەت”. پرۆفیسۆر ڕوسۆ داخواز ژ زانکۆیان کر کو فێرکرنێ ل سەر بنەمایێ ڕێزگرتنێ ئەنجامبدەن، دیالۆگا د ناڤبەرا کەلتۆراندا پێشبێخن و ئەوان زمان و کەتۆراندا بپارێزن یێن کو مەترسیا ژناڤچوونێ ل سەر ھەی و تەکەز کر کو ئاشتی “ب رێکا بیرەوەرى و دەنگی” دهێتە ئاڤاکرن.
پاشی د. دلشاد عەبدولسەلام حەلیم، هاریکارێ سەرۆکێ زانکۆیا دهۆک و ڕێکخەرێ زانستی یێ پرۆژەیێ TRANSITION، بخێرهاتنا هەمی هەڤکاران ژ هەرێما کوردستانا عیراقێ، یەمەن و ئەورۆپا، و هەروەسا بالیۆزێ یەمەنێ کر. ناڤبڕی ئاماژە دا ئەوان ئاستەنگێن دژوار یێن کو زانکۆ و جڤاکێن هەردوو وەلاتێن ئارمانج ڕویبروى دبن و جەخت ل ئەوێ چەندی کر کو زانکۆ نە تەنێ جهێن فێربوونێنە، بەلکو ئەکتەرێن سەرەکینە د ناڤ جڤاکێن خۆ دا و بەرپرسن ژ بلندکرنا ئاستێ هشیارییێ و پێشڤەبرنا گەشەپێدانا جڤاکی و کەلتۆری. هەروەسا داخواز ژ هەڤکاران کر کو پشکدارییێ د هزر و چارەسەریان پێکڤە بکەن داکو هاریکار بن بۆ زالبوونێ ل سەر ئەڤان ئاستەنگان و پشتراستببن کو پرۆژە دێ کارتێکرنەکا بەرچاڤ ل سەر جڤاکێن کێمینەهەبیت.
سەرۆکا UNIMED ، د. خەیریە ڕەسساس، دوپاتی ل ئەوێ چەندێ کر کا پرۆژەیێ TRANSITION چەند ب هویربینی گەل پەیاما UNIMED دگونجیت بۆ پێشڤەبرنا خواندنا بلند وەک بزوێنەرەک بۆ ئاشتی، دیالۆگ و گەشەپێدانا بەردەوام ل سەرانسەری دەڤەرێن ئەورۆپا-دەریایا ناڤەڕاست و ڕۆژهەلاتا ناڤەراست و باکۆرێ ئەفریقیا (MENA). د پەیڤا خۆ دا ئاماژە ب ئەوێ چەندێ کر کو پرۆژە ژ سنۆرێ ئەکادیمی دەربازدبیت و نوینەراتییا کریارەکا واتادار دکەت بۆ هەڤگرتنا جڤاکی و ئامرازەک بۆ ئاڤا کرنا پشتی شەڕی دهێتە هەژمارتن. ئەوێ هێل دانا سەر ئەوێ چەندێ کو کارێ TRANSITION “نە ب تنێ دەربارەی ئێکگرتنێیە، بەلکو دەربارەی پێکڤەگرێدانێیە”: گرێدانا نەتەوە و خەلکی ب ئێک و دووڤە، پاراستنا جوداهییان و هاندانا لێبۆرینێ، ڤەکریبوون و تێگەهشتنا ئالوگۆڕ.
د دەمێ ئاخفتنا خۆ دا ، ڕێزدار ئەسمەهان عەبدولحەمید ئەلتۆقی، بالیۆزا کۆمارا یەمەنێ ل ئیتالیایێ، خۆشحالییا خۆ دیار کر ب پشکداریکرنێ د کۆمبوونێدا و پیرۆزباهییا پشکدارییا یەمەنێ د پڕۆژێ TRANSITION دا کر. ل دویڤ گۆتنێن ئەوێ، ئەڤ جۆرە پرۆژە نە ب تنێ پشتەڤانییا خواندنا بلند دکەت، بەلکۆ هشیاری و هەڤکارییا د ناڤبەرا وەلاتان و سازییێن خواندنا بلند ژیدا بهێز دێخیت. ل دویماهییێ ، بالیۆزێ سپاسی ل UNIMED، ئێکەتییا ئەورۆپا و هەمی هەڤپشکان کر بۆ پابەندبوونا ئەوان و تەکەزی ل سەر گرنگییا بەردەوامییا کارێ پێکڤە کر، داکو مسۆگەر بکەن کو ئەنجامێن پرۆژەیی مفای دگەهینن زانکۆیێن یەمەنێ و جڤاکێ ئەوان.
ل دوماهییێ، ڕێڤەبەرێ UNIMED د. مارسیلۆ سکالیسی ، دەستخۆشییەکا تایبەت ل زانکۆیا دهۆک کر بۆ برێڤەبرنا ئێکەم پڕۆژەیێ Erasmus+ کو ژلایێ زانکۆیەکا ئیراقیڤە سەرکێشی بۆ دهێتە کرن. هەروەسا ناڤبڕی دیارکر کو کۆمسیۆنا ئەورۆپی یا پێداچوونێ د هژمارەکا سیاسەتێن خۆدا دکەت یێن گرێدای ب پشکدارییا ڕۆژهەلاتا ناڤەڕاست د پرۆگرامێ Erasmus+ دا ب تایبەتی و د هەڤکارییا نێڤدەولەتیدا ب گشتی کو ب ڕێکا ئەڤێ چەندێ دەرگەهـ دێ ل هەمبەر دەلیڤێن نوی ڤەبیت بۆ سازیێن دەڤەرێ داکو هەڤکارییێ د پڕۆژەیێن ئەورۆپیدا بکەن.
هەلسەنگاندنا پێشڤەچوونێ و دانانا پلانێ بۆ قۆناغا بهێت
کۆمبوونا هەڤپشکان ل ڕۆمایێ قۆناغەكا سەرەكی بوو ل نیڤا تەمەنێ پڕۆژەی. د دەمێ ئەڤێ کۆمبوونا دوو-ڕۆژیدا، هەڤپشکێن پرۆژەی ب هەڤکاری پێداچوون د هەمی پێشڤەچوونێن پاکێجێن کاری دا (WPs) کر ، هەروەسا دانوستاندن ل سەر ئاستەنگێن نوکە کرن و پلانا کارى یا سالا دوویێ پەسەند کر.
تەوەرێن سەرەکی یێن گەنگەشەیێ ئەڤە بوون:
- پێداچوونا پڕۆگرامێن خواندنێ:هەلسەنگاندنەک بۆ ئەوێ چەندێ بهێتە کرن کا چاوا زانکۆیێن ل کوردستانێ و یەمەنێ د نوکەدا میراتێ کەلتۆری و کێمینەیان د کەنە د ناڤ بابەتێن وانەگۆتنا خۆدا.
- نویکرنا کۆرسان: دانانا پلانێ بۆ نویکرن و ڕاستڤەکرنێن پێدڤی بۆ ئەوان کۆرسێن نوکە هەین.
- ئاڤاکرنا شیانان:دیارکرنا خشتێ خۆلێن ڕاهێنانێ یێن پاشەرۆژێ بۆ هەر دوو ستافێ مامۆستایان و یێ کارگێڕی، ل هەرێما کوردستانێ و ل ئەوروپا ب ڕێکا ڕێکخستنا دوو سەرەدانێن مەیدانی بۆ زانکۆیا سێپینزا ل ؤۆما و زانکۆیا ئێڤۆرا ل پۆرتۆگال.
- پەیوەندی و تێکەلبوون:دارێژتنا ستراتیژییان بۆ زێدەکرنا پشکدارییا جڤاکی و بلندکرنا ئاستێ هشیارییا گشتی.
- چاڤدێرییا پرۆژەی:پشتراستکرن کو پرۆژە یێ ل سەر دەمێ خۆ یێ دیارکری یێ بەردەوامە، ب تایبەتى د بوارێن دلنیایی جۆری، کەنالێن پەیوەندیکرنێ، بەلاڤکرنا ئەنجامان و کارتێکرنا ئەوان و رێڤەبرنا گشتی یا پرۆژەی.
مە ل فەیسبووک(Facebook) و لینکدئین (LinkedIn) فۆلۆ بکەن بۆ پێزانینێن نوی!